കുട്ടനാട്‌

വിക്കിപീഡിയ, ഒരു സ്വതന്ത്ര വിജ്ഞാനകോശം.

പോവുക: വഴികാട്ടി, തിരയൂ

ഇംഗ്ലീഷ് വിലാസം [പ്രദർശിപ്പിക്കുക]

കുട്ടനാട്
കുട്ടനാടിൽ നിന്നൊരു ദൃശ്യം
കുട്ടനാട് Location of കുട്ടനാട് in Kerala and India
രാജ്യം	ഇന്ത്യ
സംസ്ഥാനം	Kerala
ജില്ല(കൾ)	Alappuzha
സമയമേഖല	IST (UTC+5:30)
കോഡുകൾ • പിൻകോഡ് • 6895- • ടെലിഫോൺ • +0477 • വാഹനം • KL 04, KL 29
വെബ്‌സൈറ്റ്	www.kuttanaduassociation.com

അക്ഷാംശവും രേഖാംശവും: 9°25′30″N 76°27′50″E കേരളത്തിലെ ആലപ്പുഴ ജില്ലയിലെ പ്രധാന പ്രദേശങ്ങളിലൊന്നാണ് കുട്ടനാട്. കാർഷികവൃത്തി പ്രധാനമായുള്ള ഇവിടം കേരളത്തിലെ നെൽകൃഷിയുടെ പ്രധാന കേന്ദ്രമാണ്. ഇന്ത്യയിൽ തന്നെ ഏറ്റവും താഴ്ന്ന പ്രദേശങ്ങളിലൊന്നാണ് കുട്ടനാട്. 500 ച.കി.മീ ഓളം പ്രദേശം സമുദ്രനിരപ്പിനേക്കാൾ താഴെയാണ് സ്ഥിതിചെയ്യുന്നത് എന്നത് ഈ പ്രദേശത്തിന്റെ സവിശേഷതയാണ്. സമുദ്രനിരപ്പിൽ നിന്നും 2.2 മീ താഴെ മുതൽ 0.6 മീ മുകളിൽ വരെയാണ് ഈ പ്രദേശത്തിന്റെ ഉയര വ്യത്യാസം. സമുദ്രനിരപ്പിനുതാഴെയുള്ള പ്രദേശത്ത് കൃഷിചെയ്യുന്ന അപൂർവ്വം പ്രദേശങ്ങളിലൊന്നാണ് ഇവിടം.
നാല് പ്രധാന നദികളായ പമ്പ, മീനച്ചിലാർ, അച്ചൻ‌കോവിലാർ, മണിമലയാർ എന്നിവ കുട്ടനാട്ടിലൂടെ ഒഴുകുന്നു. ജലം കൊണ്ട് ചുറ്റപ്പെട്ടിരിക്കുന്നെങ്കിലും കുടിവെള്ളക്ഷാമം ഇവിടെ രൂക്ഷമാണ്‌. ആഴ്ചയിൽ രണ്ടുതവണ മാത്രമേ കുടിവെള്ളം ലഭിക്കുന്നുള്ളൂ.
നെല്ല്, നേന്ത്രയ്ക്ക, കപ്പ, കാച്ചിൽ എന്നിവയാണ് കുട്ടനാട്ടിലെ പ്രധാന കാർഷിക വിളകൾ .കുട്ടനാട് 31.01.2012നു കാർഷികപൈത്രുകനഗരമായ് പ്രഖ്യാപിച്ചു ^{[അവലംബം ആവശ്യമാണ്]}.

ഉള്ളടക്കം 1 പേരിനു പിന്നിൽ 2 ഗ്രാമങ്ങൾ 3 തണ്ണീർമുക്കം ബണ്ട് 4 അവലംബം 5 കൂടുതൽ വായനയ്ക്ക് 6 ഇതും കാണുക

പേരിനു പിന്നിൽ

ആദിചേരരെ കുട്ടുവർ, കുട്ടവൻ എന്നെല്ലാം വിശേഷിപ്പിച്ചിരുന്നു. ആദിചേരരാജാക്കന്മാരുടെ തലസ്ഥാനം കുട്ടനാടായിരുന്നു.^[1] ഇതാണ്‌ കുട്ടുവരുടെ നാട് എന്നർത്ഥത്തിൽ കുട്ടനാടായിത്തീർന്നത്.^[2] അക്കാലങ്ങളിൽ രാജാക്കന്മാരെ ദൈവങ്ങളായി ആരാധിക്കുന്ന സമ്പ്രദായം ഉണ്ടായിരുന്നു. ആദിചേരന്മാർക്കു ശേഷം കുട്ടൻ എന്ന പേരിൽ ഇവരെ ആരാധിച്ചു വന്നിരുന്നു. ഇവരിൽ പലരും ബുദ്ധമതവിശ്വാസികളായിരുന്നു.^[3] പിൽക്കാലത്ത് കരുമാടിയിൽ നിന്ന് ലഭിച്ച കുട്ടൻ എന്ന് വിഗ്രഹം ഇപ്രകാരത്തിലുള്ളതാണ്‌.

ഗ്രാമങ്ങൾ

എടത്വയ്ക്കടുത്ത് ഒരു നെൽപ്പാടം

കുട്ടനാട്ടിലെ ചില പ്രധാന ഗ്രാമങ്ങൾ: തകഴി, രാമങ്കരി,പുതുക്കരി, കൈപ്പുഴ, കുമരകം, എടത്വാ, മാമ്പുഴക്കരി,നീലമ്പേരൂർ, കൈനാടി, കാവാലം, പുളിങ്കുന്ന്, വെളിയനാട്, തലവടി, ചങ്ങങ്കരി, ചമ്പക്കുളം, നെടുമുടി, മൂന്നാട്ടുമുഖം, മേൽപ്പാടം, പായിപ്പാട്, കാരിച്ചാൽ, ആയപ്പറമ്പ്, വേണാട്ടുകാ‍ട്, കായൽപ്പുറം, മോങ്കൊമ്പ്, മണലടി, കൊടുപ്പുന്ന, പുല്ലങ്ങാടി

തണ്ണീർമുക്കം ബണ്ട്

പ്രധാന ലേഖനം: തണ്ണീർമുക്കം ബണ്ട്

കുട്ടനാടിൽ വ്യാപകമായി കാണപ്പെടുന്ന പാലങ്ങൾ

കുട്ടനാട്ടിലെ ജനങ്ങളുടെ പ്രധാന ഉപജീവനമാർഗ്ഗം കൃഷിയാണ്‌. നെല്ല് ഒരു പ്രധാന കാർഷികവിളയാണ്. കുട്ടനാട്ടിന് കേരളത്തിന്റെ നെല്ലറ എന്നും പേരുണ്ട്. പഴയകാലത്തെ ഇരുപ്പൂ (വർഷത്തിൽ രണ്ടു പ്രാവശ്യം കൃഷി ഇറക്കുന്ന സമ്പ്രദായം) മാറ്റി ഇന്ന് മുപ്പൂ സമ്പ്രദായം ആണ് കൂടുതൽ (വർഷത്തിൽ മൂന്ന് വിളവെടുപ്പ്). വേമ്പനാട്ടുകായലിന് സമീപമുള്ള വലിയ കൃഷിസ്ഥലങ്ങൾ പലതും കായൽ നികത്തി ഉണ്ടാക്കിയവ ആണ്.

കുട്ടനാട്ടിലെ നെൽപ്പാടം‌ നെടുമുടിക്കടുത്തുനിന്ന്

മുൻപ് മഴക്കാലത്ത് മലകളിൽ നിന്നു വരുന്ന വെള്ളം മാത്രമേ കൃഷിക്ക് അനുയോജ്യമായിരുന്നുള്ളൂ. വേനൽക്കാലത്ത് കുട്ടനാട്ടിൽ കടൽ‌വെള്ളം കയറി കൃഷിക്ക് അനുയോജ്യമല്ലാത്ത വെള്ളം കുട്ടനാട്ടിൽ നിറച്ചിരുന്നു. കേരളത്തിലെ രണ്ട് മഴക്കാ‍ലങ്ങളോട് അനുബന്ധിച്ച് വർഷത്തിൽ രണ്ട് കൃഷി മാത്രമേ സാധ്യമായിരുന്നുള്ളൂ. 1968-ൽ ഭാരത സർക്കാർ, നദിയിൽ ഒരു തടയണ കെട്ടാം എന്ന് ശുപാർശചെയ്തു. ഇതുകൊണ്ട് വേനൽക്കാലത്ത് കടൽ‌വെള്ളം നദിയിലേക്ക് പ്രവേശിക്കുന്നതു തടയാൻ കഴിയും. അങ്ങനെ കർഷകർക്ക് വർഷത്തിൽ മൂന്ന് കൃഷി ഇറക്കുവാനും കഴിയും. പദ്ധതി മൂന്നുഘട്ടങ്ങളായി തീർക്കുവാനായിരുന്നു ഉദ്ദേശിച്ചിരുന്നത് - തെക്ക് ഭാഗം, വടക്കു ഭാഗം, ഇതു രണ്ടിനെയും കൂട്ടിയോജിപ്പിക്കുന്ന മൂന്നാമത്തെ ഭാഗം. എന്നാൽ പദ്ധതി പല കാരണങ്ങൾ കൊണ്ടും താമസിച്ചു. തെക്കും വടക്കും ഭാഗങ്ങൾ നിർമ്മിച്ചുതീർന്നപ്പോൾ തന്നെ പദ്ധതിക്കായി അനുവദിച്ച മുഴുവൻ തുകയും തീർന്നു. മൂന്നാം ഘട്ടം അനിശ്ചിതത്വത്തിലായി. ഈ പദ്ധതികൊണ്ട് ഒരുപാട് സാമ്പത്തികനേട്ടങ്ങൾ പ്രതീക്ഷിച്ചിരുന്ന കർഷകർ 1972-ൽ ഒരു രാത്രികൊണ്ട് തെക്കും വടക്കും ഭാഗങ്ങൾക്ക് ഇടയ്ക്കുള്ള ഭാഗം ചെളി കൊണ്ട് നിർമ്മിച്ചു. ഇന്നും ഈ രണ്ടു ഭാഗങ്ങൾക്കിടയ്ക്ക് കർഷകർ നിർമ്മിച്ച ഭാഗം നിലനിൽക്കുന്നു.

തോട്ടപ്പള്ളി സ്പിൽ‌വേ, കുട്ടനാടിന്റെ തെക്കുഭാഗത്തെ തടയണ

ഈ ബണ്ട് കർഷകരുടെ സാമ്പത്തികസ്ഥിതി ഉയർത്തി എങ്കിലും ധാരാളം പരിസ്ഥിതി പ്രശ്നങ്ങൾ ഇതുകൊണ്ട് ഉണ്ടായി എന്ന് ആരോപിക്കപ്പെടുന്നു. ബണ്ട് നിർമ്മാണത്തിനു മുൻപ് കുട്ടനാട്ടിലെ കായലുകളിൽ ധാരാളം മത്സ്യസമ്പത്തുണ്ടായിരുന്നു. ഈ മത്സ്യങ്ങളുടെ പ്രജനനത്തിന് ഉപ്പുവെള്ളം ആവശ്യമായിരുന്നു. ബണ്ട് നിർമ്മാണം കായലിലെ മത്സ്യങ്ങളുടെ എണ്ണത്തെ ബാധിച്ചു എന്ന് ആരോപിച്ച് പ്രദേശത്തെ മുക്കുവർ 2005 മുതൽ ബണ്ടിനെ എതിർക്കുന്നു. കായലും കടലുമായി ഉള്ള ഒന്നുചേരൽ ബണ്ട് തടയുന്നതുമൂലം ആണ് കായലുകളിൽ ഇന്ന് ആഫ്രിക്കൻ പായൽ വ്യാപകമാവുന്നത് എന്നും പറയപ്പെടുന്നു. മുൻപ് കടൽ വെള്ളത്തിൽ നിന്നുള്ള ഉപ്പ് കായലിനെ ശുദ്ധീകരിച്ചിരുന്നു. ഇന്ന് കായലുകളും കായലോരവും പായൽ കൊണ്ട് മൂടിയിരിക്കുന്നു.

അവലംബം

1. ↑ ഇലവും‍മൂട്, സോമൻ (ഏപ്രിൽ 2000). പ്രാചീന കേരളചരിത്ര സം‍ഗ്രഹം (രണ്ടാം എഡിഷൻ ed.). പുതുപ്പള്ളി: ധന്യാ ബുക്സ്.
2. ↑ വാലത്ത്, വി.വി.കെ. (1991). കേരളത്തിലെ സ്ഥലനാമചരിത്രങ്ങൾ എറണാകുളം ജില്ല. തൃശ്ശൂർ: കേരള സാഹിത്യ അക്കാദമി. ISBN 81-7690-105-9.
3. ↑ വേലായുധൻ, പണിക്കശ്ശേരി (മലയാളം ഭാഷയിൽ). സഞ്ചാരികൾ കണ്ട കേരളം (2001 ed.). കോട്ടയം: കറൻറ് ബുക്സ്. താളുകൾ. 434. ISBN 81-240-1053-6.

• കടൽ നിരപ്പിനു താഴെ ദാഹം, എം. സുചിത്ര, ഹിന്ദു ദിനപ്പത്രം, 2003-07-15
• ആലപ്പുഴ, കെവിവെസ്.കോം, കേരള വ്യാപാരി വ്യവസായി ഏകോപന സമിതി
• [1]വേവ്സ് കുട്ടനാട്

കൂടുതൽ വായനയ്ക്ക്